ਜੇਕਰ ਮੈਨੂੰ ਸਾਜ਼ ਵਜਾਉਣਾ ਆਉਂਦਾ ਹੁੰਦਾ
ਮੈਂ ਵੀ ਤਾਂ ਫਿਰ ਮਹਿਫਲ ਅੰਦਰ ਗਾਉਂਦਾ ਹੁੰਦਾ
ਆਪਣੀ ਗੁੱਡੀ ਫਿਰ ਅਸਮਾਨੀ ਚੜ੍ਹ ਜਾਣੀ ਸੀ
ਵਾਂਗ ਨਚਾਰਾਂ ਜੇ ਮੈਂ ਬਾਘੀਆਂ ਪਾਉਂਦਾ ਹੁੰਦਾ
ਨੇਤਾ ਬਣ ਜਾਣਾ ਸੀ ਮੈਂ ਵੀ ਸੱਚੀਮੁਚੀ
ਲੋਕਾਂ ਨੂੰ ਜੇ ਆਪਸ ਵਿਚ ਲੜਾਉਂਦਾ ਹੁੰਦਾ
ਮੈਨੂੰ ਵੀ ਮਿਲ ਜਾਣੀ ਸੀ ਦਰਬਾਰੇ ਕੁਰਸੀ
ਤਲਵੇ ਚੱਟਦਾ ਜਾਂ ਫਿਰ ਪੂਛ ਹਿਲਾਉਂਦਾ ਹੁੰਦਾ
ਥਾਣੇ ਅਤੇ ਕਚਹਿਰੀ ਵਿਚ ਵੀ ਚੌਧਰ ਹੁੰਦੀ
ਨਾਲ ਅਫਸਰਾਂ ਮਿਲ ਸੌਦੇ ਕਰਵਾਉਂਦਾ ਹੁੰਦਾ
ਜੇ ਨਾ ਫੜਿਆ ਹੁੰਦਾ ਮਾਨਵਤਾ ਦਾ ਦਾਮਨ
ਮੈਂ ਵੀ ਬੈਠਾ ਕੱਖੋਂ ਲੱਖ ਬਣਾਉਂਦਾ ਹੁੰਦਾ
(ਬਲਜੀਤ ਪਾਲ ਸਿੰਘ)
No comments:
Post a Comment