ਲਿਖਣ ਵਾਲਿਓ ਕਹਿਣ ਵਾਲਿਓ ਲਿਖ ਲਿਖ ਕੇ ਵੀ ਥੱਕ ਗਏ ਹਾਂ
ਲਿਖ ਲਿਖ ਵੀ ਕੁਝ ਨਹੀਂ ਬਦਲਿਆ ਕਹਿ ਕਹਿ ਕੇ ਵੀ ਅੱਕ ਗਏ ਹਾਂ
ਪਤਾ ਕਰੋ ਕਿਸ ਰਾਹ ਤੇ ਸਾਥੋਂ ਵੱਡੀ ਗਲਤੀ ਹੋਈ ਹੈ
ਕੀ ਲੱਭਣਾ ਸੀ ਕੀ ਲੱਭਿਆ ਹੈ ਕਿੱਥੋਂ ਕਿੱਥੇ ਤੱਕ ਗਏ ਹਾਂ
ਜਦੋਂ ਤੁਰੇ ਤਾਂ ਇੰਜ ਲੱਗਿਆ ਸੀ ਸੌਖੇ ਮੰਜਿਲ ਪਾ ਜਾਵਾਂਗੇ
ਕਿਤੇ ਨਹੀਂ ਪਹੁੰਚੇ ਹੁਣ ਲੱਗਦਾ ਹੈ ਐਵੇਂ ਧੂੜਾਂ ਫੱਕ ਗਏ ਹਾਂ
ਧਰਤੀ ਉੱਤੇ ਕੁਝ ਨਹੀੰ ਛੱਡਿਆ ਜੋ ਗੰਧਲਾ ਨਾ ਕੀਤਾ ਹੋਵੇ
ਆਉਣ ਵਾਲੀਆਂ ਨਸਲਾਂ ਤਾਈਂ ਵੱਲ ਹਨੇਰੇ ਧੱਕ ਗਏ ਹਾਂ
ਵਧਦੀ ਗਈ ਕਹਾਣੀ ਤਾਂ ਹੀ ਜਾਬਰ ਦੇ ਜ਼ੁਲਮ ਦੀ ਏਥੇ
ਬਾਗੀ ਸੁਰ ਨੂੰ ਆਪਾਂ ਆਪਣੇ ਸੀਨੇ ਅੰਦਰ ਡੱਕ ਗਏ ਹਾਂ
ਪੱਕੇ ਢੀਠ ਹਾਂ ਅਸੀਂ ਗੁਲਾਮੀ ਜਰ ਲੈਂਦੇ ਹਾਂ ਜਦੋਂ ਮਿਲੀ ਹੈ
ਤਾਂ ਹੀ ਤਾਂ ਬਣ ਬਣ ਕੇ ਗੋਲੇ ਬੇਸ਼ਰਮੀ ਨਾਲ ਪੱਕ ਗਏ ਹਾਂ
(ਬਲਜੀਤ ਪਾਲ ਸਿੰਘ)
.
No comments:
Post a Comment