ਚੱਲੋ ਤੁਰੀਏ ਏਸ ਤਰ੍ਹਾਂ ਕਿ ਰਾਹ ਨਾ ਮੁੱਕੇ।
ਤੁਰਦੇ ਰਹੀਏ ਕਿ ਸਫਰਾਂ ਦੀ ਚਾਹ ਨਾ ਮੁੱਕੇ।
ਲੰਘੇ ਜਾਂਦੇ ਖੇਤ, ਪਿੰਡ ਤੇ ਸ਼ਹਿਰ ਬਥੇਰੇ,
ਲੰਮ ਲੰਮੇਰੀ ਏਸ ਡਗਰ ਦਾ ਥਾਹ ਨਾ ਮੁੱਕੇ।
ਕੋਈ ਗੀਤ ਲਿਖਾਂਗੇ ਜੇਕਰ ਥੱਕ ਬੈਠੇ ਤਾਂ,
ਗਾਉਂਦੇ ਰਹੀਏ ਜਦੋਂ ਤੀਕਰਾਂ ਸਾਹ ਨਾ ਮੁੱਕੇ।
ਫੁੱਲ ਕਲੀਆਂ ਨੇ ਸਾਡਾ ਸਦਾ ਸੁਆਗਤ ਕਰਨਾ,
ਕੁਦਰਤ ਕਦਮਾਂ ਹੇਠ ਵਿਛਾਇਆ ਘਾਹ ਨਾ ਮੁੱਕੇ।
ਐਸਾ ਸ਼ਿਅਰ ਸੁਣਾਓ ਕੋਈ ਦਿਲ ਨੂੰ ਮੋਹ ਜਾਵੇ ਜੋ,
ਕਿੰਨੀ ਦੇਰ ਹੀ ਲੋਕਾਂ ਦੀ ਫਿਰ ਵਾਹ ਵਾਹ ਨਾ ਮੁੱਕੇ ।
ਤੁਰਨਾ ਵਗਣਾ ਉਡਣਾ ਹੀ ਤਾਂ ਇਹ ਜੀਵਨ ਹੈ,
ਕੋਨਾ ਕੋਨਾ ਦੁਨੀਆ ਦਾ ਦਿਲ ਗਾਹ ਨਾ ਮੁੱਕੇ।
(ਬਲਜੀਤ ਪਾਲ ਸਿੰਘ)
No comments:
Post a Comment