ਹਸਤੀ ਅਜੀਬ ਮੇਰੀ ਵੱਖਰਾ ਹਿਸਾਬ ਮੇਰਾ।
ਰਸਤਾ ਨਹੀਂ ਹੈ ਬਹੁਤਾ ਸੌਖਾ ਜਨਾਬ ਮੇਰਾ।
ਜਚਦਾ ਨਹੀਂ ਹੈ ਮੇਰਾ ਇਹ ਸੁੰਨ ਮੌਣ ਮੈਨੂੰ,
ਚਿੱਠਾ ਇਹ ਖੋਲ੍ਹ ਦਿੰਦੀ ਖੁੱਲੀ ਕਿਤਾਬ ਮੇਰਾ।
ਬਣ ਕੇ ਬੇਕਿਰਕ ਹਾਕਮ ਮੈਨੂੰ ਡਰਾ ਨਾ ਐਵੇਂ,
ਹੁਣ ਮੈਂ ਕਰਾਂਗਾ ਵਾਪਸ ਤੈਨੂੰ ਖਿਤਾਬ ਮੇਰਾ ।
ਸਤਲੁਜ ਬਿਆਸ ਰਾਵੀ ਆਏ ਨੇ ਮੇਰੇ ਹਿੱਸੇ,
ਮੈਂ ਲੋਚਦਾ ਹਾਂ ਹੁੰਦਾ ਜਿਹਲਮ ਚਨਾਬ ਮੇਰਾ।
ਚੜ੍ਹਦਾ ਤੇ ਲਹਿੰਦਾ ਐਵੇਂ ਆਖੋ ਕਦੇ ਨਾ ਮੈਨੂੰ ,
ਉਹ ਵੀ ਪੰਜਾਬ ਮੇਰਾ ਇਹ ਵੀ ਪੰਜਾਬ ਮੇਰਾ।
ਪਹਿਲਾਂ ਜੋ ਬਾਰਿਸ਼ਾਂ ਨੇ ਕੀਤੀ ਸੀ ਬੇਵਫ਼ਾਈ,
ਕਣੀਆਂ ਦੇ ਨਾਲ ਭਰਿਆ ਲੇਕਿਨ ਤਲਾਬ ਮੇਰਾ।
ਸਰਕਾਰ ਆਖਦੀ ਹੈ ਉਸਤਤਿ ਲਿਖਾਂ ਮੈਂ ਉਸਦੀ,
ਮਰਜ਼ੀ ਦਾ ਪਰ ਮੈਂ ਲਿਖਣਾ ਕੋਰਾ ਜਵਾਬ ਮੇਰਾ।
(ਬਲਜੀਤ ਪਾਲ ਸਿੰਘ)
No comments:
Post a Comment