ਨਫ਼ਰਤ,ਗੁੱਸਾ,ਪਿਆਰ,ਮੁਹੱਬਤ ਦਿਲ ਅੰਦਰ ਹੈ।
ਦੁਸ਼ਮਣ, ਦੋਸਤ, ਯਾਰ ਸ਼ਨਾਖਤ ਦਿਲ ਅੰਦਰ ਹੈ।
ਸ਼ਰਧਾ ਸੱਚੀ ਹੋਵੇ ਤਾਂ ਕਿਓਂ ਕਰੀਏ ਪੂਜਾ,
ਜਦ ਕਿ ਸਾਰੀ ਹੀ ਇਬਾਦਤ ਦਿਲ ਅੰਦਰ ਹੈ।
ਕਰਾਂ ਸ਼ੁਕਰੀਆ ਤੇਰਾ ਕਿੱਦਾਂ ਮੇਰੇ ਦੋਸਤ,
ਕੀਤੀ ਜਿਹੜੀ ਤੂੰ ਇਨਾਇਤ ਦਿਲ ਅੰਦਰ ਹੈ।
ਉਹਨਾਂ ਨੂੰ ਫਿਰ ਕਿਵੇਂ ਦਿਆਂਗਾ ਉੱਤਰ ਹੁਣ ਮੈਂ ,
ਆਉਣੀ ਅੱਗੇ ਜੋ ਕਿਆਮਤ ਦਿਲ ਅੰਦਰ ਹੈ।
ਦੁਸ਼ਮਣ ਉੱਤੇ ਪਹਿਲਾਂ ਹੀ ਇਤਬਾਰ ਨਹੀਂ ਸੀ,
ਕਰ ਗਏ ਸੱਜਣ ਜੋ ਖ਼ਿਆਨਤ ਦਿਲ ਅੰਦਰ ਹੈ।
ਪਤਾ ਨਹੀਂ ਲੱਗਣਾ ਹਾਕਮ ਨੂੰ ਅੱਗੇ ਕੀ ਹੋਣਾ,
ਦੁਖੀ ਨੇ ਸਾਰੇ ਲੋਕ ਬਗਾਵਤ ਦਿਲ ਅੰਦਰ ਹੈ।
(ਬਲਜੀਤ ਪਾਲ ਸਿੰਘ)
No comments:
Post a Comment