ਬਹੁਤੇ ਲੋਕੀਂ ਪੱਥਰਾਂ ਨੂੰ ਪੂਜ ਕੇ ਤੁਰਦੇ ਬਣੇ
ਕੰਢਿਆਂ ਤੋਂ ਸਿੱਪੀਆਂ ਨੂੰ ਭਾਲ ਕੇ ਤੁਰਦੇ ਬਣੇ
ਦੋਸਤਾਂ ਨੂੰ ਸਫ਼ਰ ਔਖਾ ਜਾਪਿਆ ਤਾਂ ਉਸ ਘੜੀ
ਸੌਖਿਆਂ ਰਾਹਾਂ ਨੂੰ ਵਾਗਾਂ ਮੋੜ ਕੇ ਤੁਰਦੇ ਬਣੇ
ਬੇਵਫ਼ਾਈ ਇਸ ਕਦਰ ਮਹਿਰਮ ਨੇ ਕੀਤੀ ਅੰਤ ਨੂੰ
ਬੇਰੁਖੀ ਵਿੱਚ ਖ਼ਤ ਪੁਰਾਣੇ ਪਾੜ ਕੇ ਤੁਰਦੇ ਬਣੇ
ਹੇਠੀ ਕੀਤੀ ਚੱਲਦੀ ਮਹਿਫ਼ਲ ਦੀ ਉਹਨਾਂ ਬੇਵਜ੍ਹਾ
ਕੈੜੀ ਸੌੜੀ ਗੱਲ ਕੋਈ ਬੋਲ ਕੇ ਤੁਰਦੇ ਬਣੇ
ਜ਼ਿੰਦਗੀ ਨੂੰ ਸੇਕ ਜਿਸਦਾ ਸਾੜਦਾ ਰਹਿੰਦਾ ਸਦਾ
ਪੈਰਾਂ ਹੇਠਾਂ ਅੱਗ ਐਸੀ ਬਾਲ ਕੇ ਤੁਰਦੇ ਬਣੇ
ਇਸ ਤਰ੍ਹਾਂ ਦੇ ਕੁਝ ਮਲਾਹਾਂ ਤੇ ਭਰੋਸਾ ਕਰ ਲਿਆ
ਬੇੜੀ ਆਪਣੇ ਦੇਸ਼ ਦੀ ਜੋ ਡੋਬ ਕੇ ਤੁਰਦੇ ਬਣੇ
(ਬਲਜੀਤ ਪਾਲ ਸਿੰਘ)
94173-24432
No comments:
Post a Comment