Wednesday, January 22, 2020

ਗ਼ਜ਼ਲ


ਪੇਸ਼ੀਨਗੋਈ ਹੋ ਗਈ ਹੈ ਕਿ ਅੱਗੇ ਤੰਗ ਨੇ ਰਸਤੇ
ਬੜੇ ਹੀ ਖੁਸ਼ਕ ਕੰਡੇਦਾਰ ਤੇ ਬਦਰੰਗ ਨੇ ਰਸਤੇ

ਆਈਆਂ ਸੀ ਕਦੇ ਰੁੱਤਾਂ ਕਿ ਬਿਰਖਾਂ ਗੀਤ ਛੇੜੇ ਸੀ
ਅਜ ਉਦਰੇਵਿਆਂ ਵਾਲੇ ਬੜੇ ਮੋਹ ਭੰਗ ਨੇ ਰਸਤੇ

ਮਾਰੂਥਲ ਵੀ ਆਉਂਦਾ ਹੈ ਕਦੇ ਦਲਦਲ ਵੀ ਆ ਜਾਂਦੀ
ਬਥੇਰੇ ਰੂਪ ਇਹ ਬਦਲਣ ਤੇ ਕਰਦੇ ਦੰਗ ਨੇ ਰਸਤੇ

ਓਹਨਾਂ ਦੇ ਮਨਸ਼ਿਆਂ ਨੂੰ ਵੀ ਹਮੇਸ਼ਾ ਭਾਂਪਦਾ ਰਹਿਠਾਂ
ਬਹਿ ਕੇ ਤਖਤ ਤੇ ਆਖਣ ਜੋ ਇਕੋ ਰੰਗ ਨੇ ਰਸਤੇ

ਸਾਹਵੇਂ ਆ ਗਏ ਕੁਝ ਵਲ ਵਲੇਵੇਂ ਚਲਦਿਆਂ ਹੋਇਆਂ
ਕਦੇ ਹੁੰਦੇ ਸੀ ਸਿੱਧੇ ਸਾਫ ਅੱਜ ਬੇਢੰਗ ਨੇ ਰਸਤੇ

ਖਲੋਤੇ ਹਾਂ ਅਜਿਹੀ ਥਾਂ ਜੋ ਹੈ ਬਾਰੂਦ ਦੀ ਢੇਰੀ
ਅੱਗੇ ਇਸ ਜਗ੍ਹਾ ਤੋਂ ਆਉਣਗੇ ਬਸ ਜੰਗ ਨੇ ਰਸਤੇ
(ਬਲਜੀਤ ਪਾਲ ਸਿੰਘ)