ਬੁਝ ਗਿਆ ਹਾਂ ਮੈਂ ਕਦੇ ਦੀਪਕ ਰਿਹਾ ਹਾਂ ।
ਮਹਿਫਲਾਂ ਦੀ ਸ਼ਾਨ ਤੇ ਰੌਣਕ ਰਿਹਾ ਹਾਂ ।
ਮੈਂ ਦੰਬੂਖਾਂ ਬੀਜਦਾ ਤਾਂ ਹੋਰ ਹੋਣੀ ਸੀ ਕਹਾਣੀ,
ਪਰ ਮੈਂ ਆਗਿਆਕਾਰੀ ਇੱਕ ਬਾਲਕ ਰਿਹਾ ਹਾਂ ।
ਲਾਲਸਾ ਸੀ ਘੁੰਮ ਕੇ ਦੇਖਾਂ ਇਹ ਦੁਨੀਆ ,
ਮੈਂ ਪ੍ਰੰਤੂ ਇੱਕ ਹਲ-ਵਾਹਕ ਰਿਹਾ ਹਾਂ ।
ਬਾਗ਼ੀਆਨਾ ਆਦਤਾਂ ਦਾ ਕੀ ਸੀ ਬਣਨਾ ,
ਮੰਡੀ ਅੰਦਰ ਮੈਂ ਵੀ ਇੱਕ ਗਾਹਕ ਰਿਹਾ ਹਾਂ ।
ਚੜ੍ਹਦੇ ਸੂਰਜ ਨੂੰ ਸਲਾਮਾਂ ਹੁੰਦੀਆਂ ਨੇ,
ਪੁੱਛਣਾ ਕਿਸਨੇ ਸੀ ਮੈਂ ਠੰਡਕ ਰਿਹਾ ਹਾਂ ।
ਇਸ ਵਿਵਸਥਾ ਨੇ ਕਿਵੇਂ ਫਿਰ ਬਦਲਣਾ ਸੀ ,
ਵਿਗੜੇ ਹੋਏ ਵਾਹਨ ਦਾ ਚਾਲਕ ਰਿਹਾ ਹਾਂ ।
ਚੁਭ ਰਿਹਾ ਹਾਂ ਏਸੇ ਕਰਕੇ ਨਾਜ਼ਮਾ ਨੂੰ ,
ਮੈਂ ਹਮੇਸ਼ਾ ਮਰਜ਼ੀ ਦਾ ਮਾਲਕ ਰਿਹਾ ਹਾਂ ।
(ਬਲਜੀਤ ਪਾਲ ਸਿੰਘ)
