ਚੋਰ ਬਜ਼ਾਰੀ ਬਹੁਤ ਵਧੀ ਹੈ ਵਧੀਆਂ ਹੇਰਾ ਫੇਰੀਆਂ
ਏਸ ਲਈ ਦਾਣਾ ਮੰਡੀ ਵਿੱਚ ਖਿੱਲਰ ਗਈਆਂ ਢੇਰੀਆਂ
ਐਵੇਂ ਉੱਚੀਆਂ 'ਵਾਵਾਂ ਵਿੱਚ ਨਾ ਉੱਡ ਮੇਰੇ ਐ ਦਿਲਾ
ਅੰਬਰ ਤੀਕ ਗ਼ੁਬਾਰ ਚੜ੍ਹੇ ਨੇ ਚੜ੍ਹੀਆਂ ਦੇਖ ਹਨੇਰੀਆਂ
ਜੇਕਰ ਕਿਧਰੇ ਇਸ਼ਕ ਮੁਹੱਬਤ ਵਾਲਾ ਝਗੜਾ ਵੀ ਹੋਵੇ ਤਾਂ
ਓਦੋਂ ਮੇਰੀ ਹਾਉਮੈ ਮਰਦੀ ਮਰਨ ਆਕੜਾਂ ਮੇਰੀਆਂ
ਸ਼ਾਂਤ ਸਦਾ ਨਹੀਂ ਰਹਿੰਦਾ ਵਗਦੇ ਦਰਿਆਵਾਂ ਦਾ ਪਾਣੀ
ਉਸਦੇ ਵੀ ਅੰਗ ਸੰਗ ਹਮੇਸ਼ਾਂ ਰਹਿੰਦੀਆਂ ਘੁੰਮਣ-ਘੇਰੀਆਂ
ਵਾਜਿਬ ਨਹੀਂ ਕਿ ਹੋਰ ਕਿਸੇ ਨੂੰ ਐਵੇਂ ਹੀ ਦੋਸ਼ੀ ਠਹਿਰਾਈਏ
ਬਹੁਤੀ ਵਾਰੀ ਮਸਲਾ ਬਣਦਾ ਅਸੀਂ ਜੋ ਕਰੀਆਂ ਦੇਰੀਆਂ
ਅੱਜ ਕੱਲ ਭਾਵੇਂ ਨਵੇਂ ਜ਼ਮਾਨੇ ਦੇ ਰੁੱਖ ਕਿੰਨੇ ਹੀ ਆਏ
ਤਾਂ ਵੀ ਆਉ ਅਸੀਂ ਲਗਾਈਏ ਪਿੱਪਲ ਨਿੰਮਾਂ ਬੇਰੀਆਂ
(ਬਲਜੀਤ ਪਾਲ ਸਿੰਘ)
No comments:
Post a Comment