ਨਵੇਂ ਸਿਰੇ ਤੋਂ ਕਰਨੀ ਪੈਣੀ ਹੈ ਤਾਮੀਰ ਘਰਾਂ ਦੀ
ਹੁਣ ਬਹੁਤੀ ਨਾ ਚੰਗੀ ਲੱਗੇ ਇਹ ਤਸਵੀਰ ਘਰਾਂ ਦੀ
ਕੱਖਾਂ ਕਾਨੇ ਗਾਰੇ ਮਿੱਟੀ ਦੇ ਘਰ ਗਏ ਗੁਆਚੇ
ਰੇਤਾ ਬਜਰੀ ਇੱਟਾਂ ਲੋਹਾ ਹੁਣ ਤਾਸੀਰ ਘਰਾਂ ਦੀ
ਮਿਹਨਤ ਕਰਕੇ ਜਿਹੜੇ ਲੋਕੀਂ ਰੋਟੀ ਜੋਗੇ ਹੋਏ
ਉਹਨਾਂ ਕਿੰਨੀ ਛੇਤੀ ਬਦਲੀ ਹੈ ਤਕਦੀਰ ਘਰਾਂ ਦੀ
ਕਾਣੀ ਵੰਡ ਦੌਲਤ ਦੀ ਏਥੇ ਐਨੀ ਪੱਸਰ ਚੁੱਕੀ
ਧਨਵਾਨਾਂ ਨੇ ਦੱਬ ਰੱਖੀ ਬਹੁਤੀ ਜਾਗੀਰ ਘਰਾਂ ਦੀ
ਜਦ ਵੀ ਨਵੀਂ ਜਵਾਨੀ ਹੁਣ ਪਰਦੇਸੀ ਹੁੰਦੀ ਜਾਵੇ
ਓਦੋਂ ਬਹੁਤੀ ਹੋ ਜਾਂਦੀ ਹਾਲਤ ਗੰਭੀਰ ਘਰਾਂ ਦੀ
(ਬਲਜੀਤ ਪਾਲ ਸਿੰਘ)
ਇਹ ਬੱਦਲ ਤਾਂ ਬਥੇਰਾ ਹੈ ਵਰਸਦਾ ਫਿਰ ਨਹੀਂ ਕਾਹਤੋਂ
ਕਿ ਵਹਿੰਦਾ ਸ਼ਾਂਤ ਜੋ ਦਰਿਆ ਖੌਲਦਾ ਫਿਰ ਨਹੀਂ ਕਾਹਤੋਂ
ਕਹਾਣੀ ਹੈ ਇਹ ਸਿਰੜਾਂ ਦੀ ਸਿਰਾਂ ਨੂੰ ਵਾਰਨਾ ਪੈਣਾ
ਸਿਤਮ ਸਹਿੰਦਾ ਹੈ ਪਰ ਬੰਦਾ ਬੋਲਦਾ ਫਿਰ ਨਹੀਂ ਕਾਹਤੋਂ
ਨਵੇਂ ਲਾਏ ਹੋਏ ਪੌਦੇ ਨੂੰ ਕੁਝ ਤਾਂ ਵੀ ਕਮੀ ਹੋਣੀ
ਇਦ੍ਹੇ ਤੇ ਕਿਓਂ ਉਦਾਸੀ ਹੈ ਮੌਲਦਾ ਫਿਰ ਨਹੀਂ ਕਾਹਤੋਂ
ਅਜੇ ਲੱਗਦਾ ਫਰੇਬੀ ਮੌਸਮਾਂ ਦਾ ਬੋਲਬਾਲਾ ਹੈ
ਸੱਚ ਫਿਰ ਝੂਠ ਤੋਂ ਬਹੁਤਾ ਫੈਲਦਾ ਫਿਰ ਨਹੀਂ ਕਾਹਤੋਂ
ਅਸਾਂ ਮਾਰੂਥਲਾਂ ਅੰਦਰ ਅਜੇ ਤਾਂ ਕਰਨੀਆਂ ਸੈਰਾਂ
ਕਿ ਕਾਦਰ ਦਾ ਕ੍ਰਿਸ਼ਮਾ ਵਰਤਦਾ ਫਿਰ ਨਹੀਂ ਕਾਹਤੋਂ
ਬੜੇ ਹੀ ਤਲਖ਼ ਤੇਵਰ ਪਹਿਨ ਵਾਪਸ ਜਾ ਰਿਹਾ ਮਹਿਰਮ
ਉਹ ਮੇਰੀ ਹਰ ਨਸੀਹਤ ਨੂੰ ਗੌਲਦਾ ਫਿਰ ਨਹੀਂ ਕਾਹਤੋਂ
(ਬਲਜੀਤ ਪਾਲ ਸਿੰਘ)
ਲੱਭੀਏ ਤਾਂ ਵੀ ਨਾ ਲੱਭਦੇ ਹੁਣ ਏਥੇ ਪਾਕ ਪਵਿੱਤਰ ਬੰਦੇ
ਭੀੜਾਂ ਵਿੱਚੋਂ ਚਲੋ ਭਾਲੀਏ ਆਪਾਂ ਰਲ ਕੇ ਮਿੱਤਰ ਬੰਦੇ
ਜਿੰਨਾਂ ਲੋਕਾਂ ਅੰਦਰ ਗ਼ੈਰਤ ਉਹਨਾਂ ਨੂੰ ਹੀ ਹੋਣ ਸਲਾਮਾਂ
ਚਾਪਲੂਸੀਆਂ ਜਿਹੜੇ ਕਰਦੇ ਓਹੀਓ ਖਾਂਦੇ ਛਿੱਤਰ ਬੰਦੇ
ਜਦੋਂ ਸੁਆਰਥ ਕੋਈ ਹੋਵੇ ਜਾਂਦੇ ਤਲੀਆਂ ਚੱਟਣ ਤੀਕਰ
ਲੇਕਿਨ ਜਦ ਵੀ ਲੋੜ ਪਵੇ ਤਾਂ ਹੋ ਜਾਂਦੇ ਨੇ ਤਿੱਤਰ ਬੰਦੇ
ਸੇਵਾ ਕਰਨੀ ਕਹਿ ਕੇ ਓਦਾਂ ਜਿੱਤ ਜਾਂਦੇ ਨੇ ਭਾਵੇਂ ਚੋਣਾਂ
ਅੱਜ ਕੱਲ ਬਹੁਤੇ ਨੇਤਾ ਜਾਪਣ ਕੰਧਾਂ ਉੱਤੇ ਚਿੱਤਰ ਬੰਦੇ
ਕੌਮਾਂ ਜਦ ਵੀ ਲਹੂ ਮੰਗਦੀਆਂ ਆਜ਼ਾਦੀ ਦੇ ਜੰਗਾਂ ਅੰਦਰ
ਓਦੋਂ ਹੀ ਫਿਰ ਸਾਹਵੇਂ ਆਉਂਦੇ ਵਿਰਲੇ ਥੋੜੇ ਨਿੱਤਰ ਬੰਦੇ
(ਬਲਜੀਤ ਪਾਲ ਸਿੰਘ)
