ਲੱਭੀਏ ਤਾਂ ਵੀ ਨਾ ਲੱਭਦੇ ਹੁਣ ਏਥੇ ਪਾਕ ਪਵਿੱਤਰ ਬੰਦੇ
ਭੀੜਾਂ ਵਿੱਚੋਂ ਚਲੋ ਭਾਲੀਏ ਆਪਾਂ ਰਲ ਕੇ ਮਿੱਤਰ ਬੰਦੇ
ਜਿੰਨਾਂ ਲੋਕਾਂ ਅੰਦਰ ਗ਼ੈਰਤ ਉਹਨਾਂ ਨੂੰ ਹੀ ਹੋਣ ਸਲਾਮਾਂ
ਚਾਪਲੂਸੀਆਂ ਜਿਹੜੇ ਕਰਦੇ ਓਹੀਓ ਖਾਂਦੇ ਛਿੱਤਰ ਬੰਦੇ
ਜਦੋਂ ਸੁਆਰਥ ਕੋਈ ਹੋਵੇ ਜਾਂਦੇ ਤਲੀਆਂ ਚੱਟਣ ਤੀਕਰ
ਲੇਕਿਨ ਜਦ ਵੀ ਲੋੜ ਪਵੇ ਤਾਂ ਹੋ ਜਾਂਦੇ ਨੇ ਤਿੱਤਰ ਬੰਦੇ
ਸੇਵਾ ਕਰਨੀ ਕਹਿ ਕੇ ਓਦਾਂ ਜਿੱਤ ਜਾਂਦੇ ਨੇ ਭਾਵੇਂ ਚੋਣਾਂ
ਅੱਜ ਕੱਲ ਬਹੁਤੇ ਨੇਤਾ ਜਾਪਣ ਕੰਧਾਂ ਉੱਤੇ ਚਿੱਤਰ ਬੰਦੇ
ਕੌਮਾਂ ਜਦ ਵੀ ਲਹੂ ਮੰਗਦੀਆਂ ਆਜ਼ਾਦੀ ਦੇ ਜੰਗਾਂ ਅੰਦਰ
ਓਦੋਂ ਹੀ ਫਿਰ ਸਾਹਵੇਂ ਆਉਂਦੇ ਵਿਰਲੇ ਥੋੜੇ ਨਿੱਤਰ ਬੰਦੇ
(ਬਲਜੀਤ ਪਾਲ ਸਿੰਘ)
No comments:
Post a Comment