ਗ਼ਜ਼ਲ

ਉਦ੍ਹੇ ਦਰ ਹਾਜ਼ਰੀ ਜੇਕਰ ਭਰੀ ਤਾਂ ਫੇਰ ਕੀ ਮਿਲਿਆ

ਮੁਹੱਬਤ ਹੀ ਜੇ ਇੱਕ ਤਰਫਾ ਕਰੀ ਤਾਂ ਫੇਰ ਕੀ ਮਿਲਿਆ

ਬੜੀ ਹੀ ਘੁੱਟਣ ਵਾਲੀ ਜ਼ਿੰਦਗੀ ਜੀਣੀ ਨਹੀਂ ਸੌਖੀ

ਮਗਰ ਇੱਕ ਆਰਜ਼ੂ ਦਿਲ ਵਿੱਚ ਮਰੀ ਤਾਂ ਫੇਰ ਕੀ ਮਿਲਿਆ

ਘੜਾ ਕੱਚਾ ਨਦੀ ਗਹਿਰੀ ਉਹਦੀ ਤਕਦੀਰ ਵੀ ਕੱਚੀ

ਨਦੀ ਇਸ਼ਕੇ ਦੀ ਸੋਹਣੀ ਨੇ ਤਰੀ ਤਾਂ ਫੇਰ ਕੀ ਮਿਲਿਆ

ਵਫ਼ਾ ਨੂੰ ਪਾਲਦੇ ਜਿਹੜੇ ਉਹ ਮਿੱਤਰ ਬੇਵਫਾ ਨਿਕਲੇ

ਕਿ ਨਿਕਲੀ ਦੋਸਤੀ ਜੇ ਨਾ ਖਰੀ ਤਾਂ ਫੇਰ ਕੀ ਮਿਲਿਆ

ਕਦੇ ਨਾ ਭੁਗਤਿਆ ਜਿਹੜਾ ਵੀ ਬਣਕੇ ਸੱਚ ਦਾ ਰਹਿਬਰ

ਤਲੀ ਤੇ ਜਾਨ ਉਸ ਖਾਤਰ ਧਰੀ ਤਾਂ ਫੇਰ ਕੀ ਮਿਲਿਆ

ਨਹੀਂ ਮਿਲਦਾ ਹੈ ਮਨਚਾਹਿਆ ਬੜਾ ਕੁਝ ਹੋਰ ਮਿਲ ਜਾਂਦਾ

ਮਿਲੀ ਨਾ ਸੁਫ਼ਨਿਆਂ ਵਾਲੀ ਪਰੀ ਤਾਂ ਫੇਰ ਕੀ ਮਿਲਿਆ

(ਬਲਜੀਤ ਪਾਲ ਸਿੰਘ)

ਗ਼ਜ਼ਲ

ਹਰ ਵੇਲੇ ਇੱਕ ਦਰਦ ਅਵੱਲਾ ਨਾਲ ਤੁਰੇ

ਮੇਰਾ ਹੀ ਪਰਛਾਵਾਂ ਝੱਲਾ  ਨਾਲ ਤੁਰੇ

ਮਹਿਰਮ ਦੀ ਨਾ ਭੁੱਲੇ ਯਾਦ ਭੁਲਾਇਆਂ ਵੀ
ਚੀਚੀ ਦੇ ਵਿੱਚ ਪਾਇਆ ਛੱਲਾ ਨਾਲ ਤੁਰੇ

ਭੀੜ ਬਣੀ ਤੋਂ ਸਾਰੇ ਹੀ ਛੱਡ ਜਾਂਦੇ ਨੇ
ਸੱਚਾਈ ਦਾ ਫੜਿਆ ਪੱਲਾ ਨਾਲ ਤੁਰੇ

ਆਵੇ ਜਦੋਂ ਖਿਆਲ ਕਲਮ ਤੁਰ ਪੈਂਦੀ ਹੈ
ਓਦੋਂ ਅੱਖਰ 'ਕੱਲਾ 'ਕੱਲਾ ਨਾਲ ਤੁਰੇ

ਦੁਨੀਆ ਚੰਦਰਮਾ ਉਤੇ ਵੀ ਪਹੁੰਚ ਗਈ
ਫਿਰ ਵੀ ਏਧਰ ਟੂਣਾ ਟੱਲਾ ਨਾਲ ਤੁਰੇ
(ਬਲਜੀਤ ਪਾਲ ਸਿੰਘ)

ਗ਼ਜ਼ਲ

ਸਿਰ ਉੱਤੇ ਤਪਦਾ ਸੂਰਜ ਹੈ ਪੈਰਾਂ ਹੇਠਾਂ ਕੰਡੇ ਨੇ

ਇਸ ਪ੍ਰਕਾਰ ਸਫਰ ਤੇ ਤੁਰਦੇ ਸਾਰੇ ਦੁਖ ਸੁਖ ਵੰਡੇ ਨੇ 

ਛੱਡ ਦਿੱਤਾ ਸਾਰੇ ਐਬਾਂ ਨੂੰ ਹਾਊਮੈ ਨੂੰ ਵੀ ਛੱਡਿਆ ਹੈ

ਫਿਰ ਵੀ ਸਾਡੇ ਨੁਕਸ ਜ਼ਮਾਨੇ ਛੱਜੀਂ ਪਾ ਪਾ ਛੰਡੇ ਨੇ 

ਮਾਰੂਥਲ ਵਰਗੇ ਜੀਵਨ ਵਿੱਚ ਹਰਿਆਲੀ ਆਵੇ ਕਿੱਦਾਂ 

ਮੇਰੇ ਚੌਗਿਰਦੇ ਵਿੱਚ ਬਹੁਤੇ ਰੁੱਖ ਪੱਤਿਆਂ ਬਿਨ ਰੰਡੇ ਨੇ

ਕਿਰਚਾਂ ਛਵੀਆਂ ਤੇ ਤਲਵਾਰਾਂ ਦੀ ਰੁੱਤ ਆਈ ਲੱਗਦੀ ਹੈ

ਧਰਮਾਂ ਨੇ ਗੁੰਡਾਗਰਦੀ ਲਈ ਆਪਣੇ ਚੇਲੇ ਚੰਡੇ ਨੇ 

ਕੁੱਤਾ ਰਾਜ ਸਿੰਘਾਸਨ ਬੈਠਾ ਚੱਕੀ ਚੱਟੀ ਜਾਂਦਾ ਹੈ

ਲੋਕੀਂ ਜਦ ਹੱਕਾਂ ਲਈ ਲੜਦੇ ਉਹਨਾਂ ਖਾਤਰ ਡੰਡੇ ਨੇ

ਉੱਤਰ ਕਾਟੋ ਯਾਰ ਚੜ੍ਹੇ ਇਹ ਖੇਡ ਹੈ ਅੱਜ ਸਿਆਸਤ ਦੀ

ਸਭ ਸਰਕਾਰਾਂ ਦੇ ਹੀ ਏਥੇ ਰਲਵੇਂ ਮਿਲਵੇਂ ਫੰਡੇ ਨੇ

ਉਹਨਾਂ ਦੇ ਹਿੱਸੇ ਦੀ ਦੌਲਤ ਆਖਰ ਕਿਸਨੇ ਖੋਹੀ ਹੈ

ਨਿਰਧਨ ਲਾਚਾਰਾਂ ਦੇ ਚੁੱਲ੍ਹੇ ਬਸਤੀ ਅੰਦਰ ਠੰਡੇ ਨੇ

(ਬਲਜੀਤ ਪਾਲ ਸਿੰਘ)