ਲੋਕਾਂ ਖਾਤਰ ਜੋ ਨਹੀਂ ਲਿਖਦੇ, ਉਹ ਸਰਕਾਰਾਂ ਪੱਖੀ ਨੇ
ਹੱਕਾਂ ਖਾਤਰ ਜੋ ਨਹੀਂ ਲੜਦੇ, ਉਹ ਸਰਕਾਰਾਂ ਪੱਖੀ ਨੇ
ਧੁਖਦੇ ਰਹਿੰਦੇ ਅੰਦਰੋਂ ਅੰਦਰ ਪਰ ਗੋਲੇ ਬਾਰੂਦੀ ਵਾਂਗ
ਭਾਂਬੜ ਬਣਕੇ ਜੋ ਨਹੀਂ ਮੱਚਦੇ, ਉਹ ਸਰਕਾਰਾਂ ਪੱਖੀ ਨੇ
ਸੱਦਾ ਪੱਤਰ ਜੇ ਸਰਕਾਰੀ ਦਫ਼ਤਰ ਭੇਜੇ ਤਾਂ ਓਥੇ ਫਿਰ
ਭਾਸ਼ਣ ਦਿੰਦੇ ਬਹਿਸਾਂ ਕਰਦੇ, ਉਹ ਸਰਕਾਰਾਂ ਪੱਖੀ ਨੇ
ਜੀਵਨ ਵਿੱਚ ਰਵਾਨੀ ਹੋਣੀ ਚਾਹੀਦੀ ਹੈ ਨਦੀਆਂ ਵਾਂਗ
ਬੋਚ ਬੋਚ ਕੇ ਜੋ ਪੱਬ ਧਰਦੇ,ਉਹ ਸਰਕਾਰਾਂ ਪੱਖੀ ਨੇ
ਆਟਾ ਦਾਲ ਸਹੂਲਤ ਨਿਰਧਨ ਨੂੰ ਤਾਂ ਮਿਲਣੀ ਚਾਹੀਦੀ
ਜਿਹੜੀ ਲੈਂਦੇ ਪੁੱਜਦੇ ਸਰਦੇ, ਉਹ ਸਰਕਾਰਾਂ ਪੱਖੀ ਨੇ
ਕਾਲੀ ਰਾਤ ਹਨੇਰੇ ਅੰਦਰ,ਜੋ ਕਰਦੇ ਨੇ ਕਾਲਾ ਧੰਦਾ
ਚਾਨਣ ਕੋਲੋਂ ਜਿਹੜੇ ਡਰਦੇ,ਉਹ ਸਰਕਾਰਾਂ ਪੱਖੀ ਨੇ
(ਬਲਜੀਤ ਪਾਲ ਸਿੰਘ)
No comments:
Post a Comment