ਮੈਂ ਕਹਿੰਦਾ ਹਾਂ ਅਜੇ ਵੀ ਡੁਲ੍ਹੇ ਬੇਰਾਂ ਨੂੰ ਜੇ ਚੁਣ ਲਈਏ ਬਚ ਜਾਵਾਂਗੇ
ਝਗੜੇ ਛੱਡ ਕੇ ਆਪਸ ਵਿੱਚ ਜੇ ਮਿਲ ਕੇ ਰਹੀਏ ਬਚ ਜਾਵਾਂਗੇ
ਦੌਲਤ ਸ਼ੁਹਰਤ ਚੌਧਰ ਹਰ ਥਾਂ ਕੰਮ ਨਹੀਂ ਆਉਂਦੀ ਇਹ ਸਮਝੋ
ਕਾਇਮ ਰੱਖੀਏ ਭਾਈਚਾਰਾ ਤੇ ਭਾਈਆਂ ਵਿੱਚ ਬਹੀਏ ਬਚ ਜਾਵਾਂਗੇ
ਚੋਰੀ,ਠੱਗੀ ਅਤੇ ਤਸਕਰੀ ਜੋ ਕਰਦੇ ਉਹਨਾਂ ਨੂੰ ਮੂੰਹ ਨਾ ਲਾਓ
ਪੰਚਾਇਤਾਂ ਸੱਥਾਂ ਵਿੱਚ ਜੇ ਸੱਚੀ ਗੱਲ ਮੂੰਹ ਤੇ ਕਹੀਏ ਬਚ ਜਾਵਾਂਗੇ
ਅੰਨੀ ਦੌੜ ਹੈ ਪੈਸੇ ਪਿੱਛੇ ਭੱਜੀ ਫਿਰਦੀ ਸਾਰੀ ਇਹ ਦੁਨੀਆ
ਨੇਕੀ ਕਰੀਏ ਮਾੜੇ ਕੰਮਾਂ ਵਿੱਚ ਜੇ ਨਾ ਪਈਏ ਬਚ ਜਾਵਾਂਗੇ
ਸਦੀਆਂ ਤੋਂ ਜੋ ਤੁਰੇ ਆਉਂਦੀਆਂ ਚੰਗੀਆਂ ਰੀਤਾਂ ਚੰਗੀਆਂ ਰਸਮਾਂ
ਉਹਨਾਂ ਉੱਤੇ ਪਹਿਰਾ ਦਈਏ ਤੇ ਨਾ ਲੀਹੋਂ ਲਹੀਏ ਬਚ ਜਾਵਾਂਗੇ
(ਬਲਜੀਤ ਪਾਲ ਸਿੰਘ)
No comments:
Post a Comment