ਜ਼ਮਾਨਾ ਜਿਸ ਤਰ੍ਹਾਂ ਦਾ ਆ ਗਿਆ ਹੈ, ਜਾਣਦੇ ਹਾਂ।
ਕਿ ਬੱਦਲ ਬੇਰੁਖੀ ਦਾ ਛਾਅ ਗਿਆ ਹੈ, ਜਾਣਦੇ ਹਾਂ।
ਮਖੌਟੇ ਲਾਹ ਦਿਓ ਭੀੜਾਂ ਚੋਂ ਨਿਕਲੋ ਬਾਹਰ ਆਓ,
ਇਹ ਚਿਹਰਾ ਕਾਸਤੋਂ ਮੁਰਝਾ ਗਿਆ ਹੈ, ਜਾਣਦੇ ਹਾਂ।
ਇਹ ਕੁਦਰਤ ਨੇ ਸਜਾਇਆ ਸਾਰਿਆਂ ਲਈ ਗੁਲਿਸਤਾਂ ਜੋ,
ਉਹ ਖੁਸ਼ ਹੈ ਭੇਦ ਜਿਹੜਾ ਪਾ ਗਿਆ ਹੈ, ਜਾਣਦੇ ਹਾਂ।
ਬੜੀ ਹੀ ਠੇਸ ਪਹੁੰਚੀ ਹੈ ਵਤੀਰਾ ਦੇਖ ਕੇ ਉਸਦਾ,
ਜੋ ਅਪਣਾ ਸੀ ਉਹ ਤੋਹਮਤ ਲਾ ਗਿਆ ਹੈ, ਜਾਣਦੇ ਹਾਂ।
ਹਟੀ ਜੇ ਸਾਵਧਾਨੀ ਤਾਂ ਇਹ ਹੋਇਆ ਹਾਦਸਾ ਹੈ,
ਨਹੀਂ ਜੋ ਸਮਝਦਾ ਉਹ ਧੋਖਾ ਖਾ ਗਿਆ ਹੈ, ਜਾਣਦੇ ਹਾਂ।
ਅਜੇ ਵੀ ਜ਼ਖ਼ਮ ਨੇ ਅੱਲੇ ਬਥੇਰਾ ਦਰਦ ਦਿੰਦੇ ਨੇ,
ਵਕਤ ਵੀ ਸਿਤਮ ਐਨਾ ਢਾਅ ਗਿਆ ਹੈ, ਜਾਣਦੇ ਹਾਂ।
(ਬਲਜੀਤ ਪਾਲ ਸਿੰਘ)
