World

Thursday, November 28, 2019

ਗ਼ਜ਼ਲ





ਦੋਸਤਾਨਾ  ਜਿੰਦਗੀ ਦੇ ਸਫਰ ਦਾ ਹਾਮੀ ਰਿਹਾ ਹਾਂ
ਹਰ ਸਮੇਂ ਹੀ ਸਾਫ ਸੱਚੀ ਖਬਰ ਦਾ ਹਾਮੀ ਰਿਹਾ ਹਾਂ

ਭਾਲਿਆ ਜਿਸਨੂੰ ਉਹ ਮਿਲਿਆ ਕੁਝ ਪਲਾਂ ਦੇ ਵਾਸਤੇ
ਪਰ ਇਕੱਠੇ ਤੁਰਨ ਵਾਲੀ ਡਗਰ ਦਾ ਹਾਮੀ ਰਿਹਾ ਹਾਂ 

ਭਾਈਚਾਰਾ ਖੂਬ ਹੋਵੇ ਚਾਈਂ ਚਾਈਂ ਲੋਕ ਵੱਸਣ
ਘਰ ਬਰਾਬਰ ਹੋਣ ਐਸੇ ਨਗਰ ਦਾ ਹਾਮੀ ਰਿਹਾ ਹਾਂ 

ਮੈਂ ਕਿਹਾ ਉਸਨੇ ਕਿਹਾ ਸਭ ਨੇ ਕਿਹਾ ਸੋ ਜਰ ਲਿਆ
ਕਰ ਲਿਆ ਹੈ ਸਾਰਿਆਂ ਜੋ ਸਬਰ ਦਾ ਹਾਮੀ ਰਿਹਾ ਹਾਂ 

ਜੋ ਵੀ ਝੱਲਦਾ ਮੀਂਹ ਹਨੇਰੀ ਝੱਖੜਾਂ ਦੀ ਮਾਰ ਨੂੰ  
ਕਰ ਲਵਾਂ ਸਿਜਦਾ ਅਜਿਹੇ ਸ਼ਜਰ ਦਾ ਹਾਮੀ ਰਿਹਾ ਹਾਂ 

ਜੇਹੜੀ ਤੱਕੇ ਰਿਸ਼ਤਿਆਂ ਦੀ ਅਹਿਮੀਅਤ ਨੂੰ ਇਸ ਕਦਰ
ਸਭ ਤੋਂ ਪਹਿਲਾਂ ਇਸ ਤਰਾਂ ਦੀ ਨਜ਼ਰ ਦਾ ਹਾਮੀ ਰਿਹਾ ਹਾਂ
(ਬਲਜੀਤ ਪਾਲ ਸਿੰਘ)