ਕਦੇ ਜੇ ਰਿਸ਼ਤਿਆਂ ਨੂੰ ਪਰਖਿਆ ਤਾਂ ਕੀ ਮਿਲ਼ੇਗਾ
ਨਤੀਜਾ ਫੇਰ ਮਾੜਾ ਨਿਕਲਿਆ ਤਾਂ ਕੀ ਮਿਲ਼ੇਗਾ
ਬੜਾ ਸੌਖਾ ਜਿਹਾ ਹੈ ਜ਼ਿੰਦਗੀ ਦਾ ਫਲਸਫਾ ਸਮਝੋ
ਗਣਿਤ ਰੁੱਤਾਂ ਦਾ ਜੇ ਨਾ ਸਮਝਿਆ ਤਾਂ ਕੀ ਮਿਲ਼ੇਗਾ
ਇਹ ਸੱਚ ਹੈ ਸੁੱਕਣੇ ਦਰਿਆ ਤੇ ਨਦੀਆਂ ਖ਼ੁਸ਼ਕ ਹੋਣੈ
ਇਹਨਾਂ ਨੂੰ ਬੇਤਹਾਸ਼ਾ ਵਰਤਿਆ ਤਾਂ ਕੀ ਮਿਲ਼ੇਗਾ
ਬੜੇ ਮੂੰਹ ਜ਼ੋਰ ਏਥੇ ਵਗ ਰਹੀ ਜੋ ਪੌਣ ਕੀ ਕਰੀਏ
ਇਹਦੀ ਰਫ਼ਤਾਰ ਨੂੰ ਨਾ ਵਰਜਿਆ ਤਾਂ ਕੀ ਮਿਲ਼ੇਗਾ
ਘਰਾਂ ਨੂੰ ਛੱਡ ਲਹਿੰਦੇ ਦੇਸ਼ ਤੋਂ ਹੁਣ ਆ ਗਏ ਏਥੇ
ਗਿਆ ਨਾ ਫੇਰ ਓਧਰ ਪਰਤਿਆ ਤਾਂ ਕੀ ਮਿਲ਼ੇਗਾ
ਮਸਲਾ ਇਹ ਨਹੀਂ ਕਿ ਮੀਚ ਕੇ ਅੱਖਾਂ ਤੁਰੇ ਫਿਰੀਏ
ਕਿ ਜੀਵਨ ਇਸ ਤਰ੍ਹਾਂ ਜੇ ਗੁਜ਼ਰਿਆ ਤਾਂ ਕੀ ਮਿਲ਼ੇਗਾ
ਸਦਾ ਸੰਤਾਪੀਆਂ ਜੂਹਾਂ ਦੇ ਵਾਸੀ ਵਾਂਗਰਾਂ ਰਹਿ ਕੇ
ਅਸੀਂ ਕਿਰਦਾਰ ਜੇ ਨਾ ਬਦਲਿਆ ਤਾਂ ਕੀ ਮਿਲ਼ੇਗਾ
(ਬਲਜੀਤ ਪਾਲ ਸਿੰਘ)
No comments:
Post a Comment