ਬਥੇਰੇ ਫਲਸਫੇ ਏਥੇ ਤੇ ਨਾਅਰੇ ਨੇ ਬੜੇ ਉੱਚੇ
ਮਜ਼ਹਬ ਵਾਲਿਆਂ ਦੇ ਵੀ ਜੈਕਾਰੇ ਨੇ ਬੜੇ ਉੱਚੇ
ਨਦੀ ਖਾਮੋਸ਼ ਵਹਿੰਦੀ ਏਸਦਾ ਨਿਰਮਲ ਬੜਾ ਪਾਣੀ
ਇਦ੍ਹੇ ਵਿੱਚ ਠਿੱਲ ਤਾਂ ਪੈਂਦੇ ਕਿਨਾਰੇ ਨੇ ਬੜੇ ਉੱਚੇ
ਉਨ੍ਹਾਂ ਸੰਗ ਮੇਲ ਹੋਣਾ ਜਾਪਦਾ ਹੁਣ ਤਾਂ ਨਹੀਂ ਸੌਖਾ
ਅਸੀਂ ਨੀਵੀਂ ਜਗ੍ਹਾ ਬੈਠੇ ਪਿਆਰੇ ਨੇ ਬੜੇ ਉੱਚੇ
ਬੜੀ ਹੀ ਦੂਰ ਤੋਂ ਜੋ ਟਿਮਟਿਮਾਉਂਦੇ ਰਾਤ ਨੂੰ ਤੱਕੋ
ਅਸਾਡੀ ਪਹੁੰਚ ਤੋਂ ਅੱਗੇ ਸਿਤਾਰੇ ਨੇ ਬੜੇ ਉੱਚੇ
ਬਰਾਬਰ ਏਸ ਨੂੰ ਕਰਕੇ ਹਮੇਸ਼ਾ ਸਿੰਜਣਾ ਚਾਹੁੰਨਾ
ਮਗਰ ਕੁਝ ਖੇਤ ਮੇਰੇ ਦੇ ਕਿਆਰੇ ਨੇ ਬੜੇ ਉੱਚੇ
ਉਹ ਕਹਿੰਦੇ ਝੂਟ ਕੇ ਜਾਣਾ ਮੈਂ ਉੱਚੀ ਪੀਂਘ ਹੈ ਪਾਈ
ਮਨਾਂ ਵਿੱਚ ਖ਼ੌਫ਼ ਡਾਢਾ ਹੈ ਹੁਲਾਰੇ ਨੇ ਬੜੇ ਉੱਚੇ
ਬੜਾ ਬੋਝਲ ਬਣਾ ਦਿੱਤਾ ਹੈ ਕੋਮਲ ਰਿਸ਼ਤਿਆਂ ਤਾਈਂ
ਕਦੇ ਵੀ ਸੂਤ ਨਹੀਂ ਆਉਣੇ ਖਲਾਰੇ ਨੇ ਬੜੇ ਉੱਚੇ
(ਬਲਜੀਤ ਪਾਲ ਸਿੰਘ)
No comments:
Post a Comment