ਥੋੜੇ ਲੋਕੀਂ ਜੀਵਨ ਦੀਆਂ ਬਹਾਰਾਂ ਮਾਣ ਰਹੇ ਨੇ
ਬਾਕੀ ਤਾਂ ਬਸ ਐਵੇਂ ਮਿੱਟੀ ਘੱਟਾ ਛਾਣ ਰਹੇ ਨੇ
ਬਹੁਤੇ ਬੰਦੇ ਚਾਹੁੰਦੇ ਚਲੋ ਕਮਾ ਲਈਏ ਦੌਲਤ
ਵਿਰਲੇ ਟਾਂਵੇਂ ਕੁਦਰਤ ਦੇ ਭੇਦਾਂ ਨੂੰ ਜਾਣ ਰਹੇ ਨੇ
ਧਰਮਾਂ ਦੇ ਨਾਂਅ ਉੱਤੇ ਬੜੀ ਸਿਆਸਤ ਹੋਈ ਹੈ
ਬਾਬੇ ਡੇਰੇ ਉਹਨਾਂ ਲਈ ਸੋਨੇ ਦੀ ਖਾਣ ਰਹੇ ਨੇ
ਭੋਲੇ ਨੇ ਲੋਕੀਂ ਕਿ ਜੋ ਉਹਨਾਂ ਨੂੰ ਲੁੱਟਣ ਮਾਰਨ
ਉਹਨਾਂ ਦਾ ਹੀ ਫਿਰ ਕਰਦੇ ਗੁਣ-ਗਾਣ ਰਹੇ ਨੇ
ਸਾਡੇ ਪਿੰਡ ਸੰਤਾਪ ਭੋਗਦੇ ਨੇ ਕੁਝ ਏਸ ਤਰ੍ਹਾਂ
ਏਥੋਂ ਕਰੀਏ ਹਿਜਰਤ ਸਾਰੇ ਇਹੋ ਠਾਣ ਰਹੇ ਨੇ
(ਬਲਜੀਤ ਪਾਲ ਸਿੰਘ)
No comments:
Post a Comment