ਸੁੰਨੇ ਘਰ ਵਿੱਚ ਸਮਾਂ ਲੰਘਾਉਣਾ ਔਖਾ ਲੱਗੇ
ਇਕਲਾਪੇ ਨੂੰ ਗਲੇ ਲਗਾਉਣਾ ਔਖਾ ਲੱਗੇ
ਰਾਤ ਹਨੇਰੀ ਮੌਸਮ ਦੇ ਵਿੱਚ ਤਲਖ਼ੀ ਤੇਜ਼ੀ
ਝੱਖੜ ਦੇ ਵਿੱਚ ਦੀਪ ਜਗਾਉਣਾ ਔਖਾ ਲੱਗੇ
ਯਾਦਾਂ ਦੇ ਨਾਲ ਭਰ ਚੁੱਕਾ ਹੈ ਜਿਹੜਾ ਹਿਰਦਾ
ਉਸਨੂੰ ਹੁਣ ਖਾਲੀ ਕਰਵਾਉਣਾ ਔਖਾ ਲੱਗੇ
ਅੱਖਾਂ ਦੇ ਵਿੱਚ ਉੱਭਰ ਆਇਆ ਦਰਦ ਅਵੱਲਾ
ਜਿਸਨੂੰ ਸ਼ਬਦਾਂ ਨਾਲ ਛੁਪਾਉਣਾ ਔਖਾ ਲੱਗੇ
ਵਕਤ ਦਾ ਅੰਨ੍ਹਾ ਘੋੜਾ ਸਰਪਟ ਦੌੜੀ ਜਾਂਦਾ
ਕਦਮਾਂ ਨੂੰ ਉਸ ਨਾਲ ਮਿਲਾਉਣਾ ਔਖਾ ਲੱਗੇ
ਝੂਠੀ ਗੱਲ ਹੈ ਅੰਬਰ ਵਿੱਚੋਂ ਤਾਰੇ ਚੁਗਣਾ
ਜ਼ੁਲਫ਼ਾਂ ਦੇ ਵਿੱਚ ਫੁੱਲ ਸਜਾਉਣਾ ਔਖਾ ਲੱਗੇ
ਸੁਫਨੇ ਅੰਦਰ ਕੋਈ ਵੀ ਮੁਮਤਾਜ ਨਹੀਂ ਸੀ
ਤਾਜਮਹਿਲ ਤਾਂ ਹੀ ਬਣਵਾਉਣਾ ਔਖਾ ਲੱਗੇ
(ਬਲਜੀਤ ਪਾਲ ਸਿੰਘ)
No comments:
Post a Comment