ਗੀਤਾਂ ਗ਼ਜ਼ਲਾਂ ਕਵਿਤਾਵਾਂ ਦੀ ਗੱਲ ਕਰਾਂਗੇ
ਆਪਾਂ ਪੰਜਾਂ ਦਰਿਆਵਾਂ ਦੀ ਗੱਲ ਕਰਾਂਗੇ
ਅੱਲੜ ਉਮਰੇ ਜਿਨ੍ਹਾਂ ਹੇਠਾਂ ਉਮਰ ਲੰਘਾਈ
ਉਹਨਾਂ ਰੁੱਖਾਂ ਤੇ ਛਾਵਾਂ ਦੀ ਗੱਲ ਕਰਾਂਗੇ
ਜਿਨ੍ਹਾਂ ਉੱਤੇ ਤੁਰਦੇ ਹੁਣ ਤੀਕਰ ਆਏ ਹਾਂ
ਕੱਚੇ ਪਹਿਆਂ ਤੇ ਰਾਹਵਾਂ ਦੀ ਗੱਲ ਕਰਾਂਗੇ
ਚੌਂਕਾ ਚੁੱਲਾ ਸਾਂਭ ਲਿਆ ਮਮਤਾ ਵੀ ਪਾਲੀ
ਉਹਨਾਂ ਸਭ ਸਿਰੜੀ ਮਾਵਾਂ ਦੀ ਗੱਲ ਕਰਾਂਗੇ
ਜਦ ਵੀ ਕੋਈ ਬਿਪਤਾ ਘੇਰ ਖੜੋਈ ਤਾਂ ਫਿਰ
ਬਿਨ ਭਾਈਆਂ ਭੱਜੀਆਂ ਬਾਹਵਾਂ ਦੀ ਗੱਲ ਕਰਾਂਗੇ
ਜਦੋਂ ਉਜਾੜਾ ਘੁੱਗੀਆਂ ਦਾ ਹੋਇਆ ਫਿਰ ਓਦੋਂ
ਚੀਲਾਂ ਗਿਰਝਾਂ ਤੇ ਕਾਵਾਂ ਦੀ ਗੱਲ ਕਰਾਂਗੇ
(ਬਲਜੀਤ ਪਾਲ ਸਿੰਘ)
No comments:
Post a Comment