ਗ਼ਜ਼ਲ

ਦਿਲ ਕਰਦਾ ਹੈ ਮੇਰਾ ਜੇਕਰ ਮੈਂ ਦੁਨੀਆਂ ਦਾ ਹਾਕਮ ਹੋਵਾਂ

ਦੇਵਾਂ ਸੁਰ ਹਰ ਬਾਸ਼ਿੰਦੇ ਨੂੰ ਮੈਂ ਏਸ ਤਰ੍ਹਾਂ ਦੀ ਸਰਗ਼ਮ ਹੋਵਾਂ

ਹਰ ਵੇਲੇ ਹੀ ਰਾਗ ਅਲਾਪਾਂ ਲੋਕਾਂ ਦੇ ਕਲਿਆਣ ਲਈ ਮੈਂ 

ਨੇੜੇ ਤੇੜੇ ਦੱਬੇ-ਕੁਚਲੀ ਪਰਜਾ ਦਾ ਮੈਂ ਪਰਚਮ ਹੋਵਾਂ

ਪਰਦੇ ਤੇ ਸ਼ੀਸ਼ੇ ਦੇ ਓਹਲੇ ਵਾਲਾ ਜੀਵਨ ਕੀ ਕਰਨਾ ਮੈਂ

ਦੁਖਿਆਰਾਂ ਦੀ ਸੇਵਾ ਖਾਤਿਰ ਹਾਜ਼ਰ ਫਿਰ ਹਰਦਮ ਹੋਵਾਂ

ਭਰੇ ਖ਼ਜ਼ਾਨੇ ਠੋਕਰ ਮਾਰਾਂ ਛੱਡ ਦਿਆਂ ਮੈਂ ਮਹਿਲਾਂ ਤਾਈਂ

ਹਰ ਗੋਰੀ ਦੇ ਪੈਰਾਂ ਵਾਲੀ ਝਾਂਜਰ ਦੀ ਮੈਂ ਛਮ-ਛਮ ਹੋਵਾਂ

ਮੈਨੂੰ ਨਹੀਂ ਬਰਦਾਸ਼ਤ ਫੁੱਲਾਂ ਤੇ ਬੱਚਿਆਂ ਦਾ ਮੁਰਝਾ ਜਾਣਾ

ਚਾਹੁੰਦਾ ਹਾਂ ਮੈਂ ਹਰ ਬੱਚੇ ਦੇ ਜ਼ਖਮਾਂ ਉੱਤੇ ਮਰਹਮ ਹੋਵਾਂ

(ਬਲਜੀਤ ਪਾਲ ਸਿੰਘ)