ਗ਼ਜ਼ਲ

ਦੁਨੀਆ ਵਿੱਚ ਤਰਥੱਲ ਬਥੇਰੀ

ਹਰ ਕੋਈ ਚਾਹੁੰਦਾ ਭੱਲ ਬਥੇਰੀ 

ਕਿੰਨਾ ਕੁਝ ਹੀ ਰੋੜ੍ਹ ਲਿਜਾਵੇ

ਸਾਗਰ ਦੀ ਇੱਕ ਛੱਲ ਬਥੇਰੀ

ਬਹੁਤੇ ਕੂੜ ਗਪੌੜਾਂ ਨਾਲੋਂ

ਇੱਕੋ ਸੱਚੀ ਗੱਲ ਬਥੇਰੀ 

ਹੇਰਾਫੇਰੀ ਬੰਦ ਨਾ ਹੋਵੇ

ਭਾਵੇਂ ਪਾਈ ਠੱਲ ਬਥੇਰੀ 

ਦਫ਼ਤਰ ਥਾਣੇ ਅਤੇ ਕਚਹਿਰੀ

ਲਾਹੁੰਦੇ ਨੇ ਹੁਣ ਖੱਲ ਬਥੇਰੀ

ਥਾਂ ਥਾਂ ਉੱਤੇ ਡੇਰੇ ਖੁੱਲ੍ਹੇ

ਸੰਗਤ ਆਉਂਦੀ ਚੱਲ ਬਥੇਰੀ 

ਮੇਰੀ ਮੇਰੀ ਕਰਕੇ ਸਾਰੇ

ਮਾਰਨ ਵੱਡੀ ਮੱਲ ਬਥੇਰੀ

ਬੰਦਿਆ ਨੇਕੀ ਕਰਿਆ ਕਰ ਤੂੰ

ਦੁਨੀਆ ਤੇਰੇ ਵੱਲ ਬਥੇਰੀ 

(ਬਲਜੀਤ ਪਾਲ ਸਿੰਘ)