ਗ਼ਜ਼ਲ

ਸਾਰਿਆਂ ਬਾਗਾਂ ਨੂੰ ਕੋਈ ਚੱਜ ਦਾ ਮਾਲੀ ਮਿਲੇ
ਐ ਖ਼ੁਦਾ ਹਰ ਬਸ਼ਰ ਨੂੰ ਏਥੇ ਭਰੀ ਥਾਲੀ ਮਿਲੇ

ਆਉਣ ਪੌਣਾਂ ਠੰਢੀਆਂ ਹੋਵੇ ਫਿਜ਼ਾ ਵਿਚ ਤਾਜ਼ਗੀ
ਭੀੜ ਅੰਦਰ ਭਟਕਦੇ ਹਰ ਮੁੱਖ ਤੇ ਲਾਲੀ ਮਿਲੇ

ਖਿੜਿਆ ਖਿੜਿਆ ਚਹਿਕਦਾ ਮਦਹੋਸ਼ ਹੋਵੇ ਗੁਲਸਿਤਾਨ
ਟਹਿਕਦਾ ਹਰ ਫੁੱਲ ਹੋਵੇ ਮਹਿਕਦੀ ਡਾਲੀ ਮਿਲੇ

ਜਦ ਵੀ ਤੁਰੀਏ ਮਿਲ ਪਵੇ ਕੋਈ ਖੂਬਸੂਰਤ ਚਾਰਾਗਰ
ਥਾਈਂ ਥਾਈਂ ਮਹਿਫਲਾਂ ਕੋਈ ਨਾ ਦਰ ਖਾਲੀ ਮਿਲੇ

ਹਰ ਸਵੇਰੇ ਹੀ ਸੁਨਹਿਰੀ ਕਿਰਨ ਆਵੇ ਮਟਕਦੀ
ਰੌਸ਼ਨੀ ਚਮਕੇ ਸਦਾ ਤਕਦੀਰ ਨਾ ਕਾਲੀ ਮਿਲ਼ੇ
(ਬਲਜੀਤ ਪਾਲ ਸਿੰਘ)