ਗ਼ਜ਼ਲ

ਕੇਵਲ ਕੁਝ ਯਾਦਾਂ ਬਚੀਆਂ ਨੇ ਹੋਰ ਕੋਈ ਸਰਮਾਇਆ ਨਾ
ਜੀਵਨ ਮਾਰੂਥਲ ਵਰਗਾ ਹੈ ਤੇ ਰੁੱਖਾਂ ਦਾ ਸਾਇਆ ਨਾ

ਕੋਝੀ ਚਾਲ ਹੈ ਰੁੱਤਾਂ ਚੱਲੀ ਸੁੰਨ-ਮ- ਸੁੰਨੇ ਸਭ ਰਸਤੇ
ਚਾਰੇ ਪਾਸੇ ਆਤਿਸ਼ ਫੈਲੀ ਠੰਡਾ ਬੁੱਲਾ ਆਇਆ ਨਾ

ਖੂਬ ਅਸੀਂ ਖੇਡਾਂਗੇ ਹੋਲੀ ਹਰ ਵਾਰੀ ਇਹ ਸੋਚੀਦਾ 
ਲੇਕਿਨ ਸਾਰੇ ਸਾਥੀ ਰੁੱਸੇ ਰੰਗ ਕਿਸੇ ਨੇ ਪਾਇਆ ਨਾ

ਰੁੱਖਾਂ ਦਾ ਤਾਂ ਪੱਤਾ ਪੱਤਾ ਮਸਤੀ ਵਿਚ ਲਹਿਰਾਉਂਦਾ ਹੈ 
ਬੇਮੁੱਖ ਪੌਣਾਂ ਮੇਰੀ ਖਾਤਿਰ ਗੀਤ ਕੋਈ ਵੀ ਗਾਇਆ ਨਾ

ਸ਼ਾਮ-ਸਵੇਰੇ ਘੇਰ-ਘੇਰ ਕੇ ਘੋਰ ਉਦਾਸੀ ਪੁੱਛਦੀ ਹੈ
ਕਿਉਂ ਤੂੰ ਪੰਧ ਲਮੇਰੇ ਕੀਤੇ ਮੰਜਿਲ ਨੂੰ ਵੀ ਪਾਇਆ ਨਾ
(ਬਲਜੀਤ ਪਾਲ ਸਿੰਘ)