ਆਪਣਿਆਂ ਨੂੰ ਦੁੱਖ ਨਾ ਦੇਣਾ ਤੇਰੀ ਫਿਤਰਤ ਹੋ ਸਕਦੀ ਹੈ
ਆਪਣਿਆਂ ਤੋਂ ਬਚ ਕੇ ਰਹਿਣਾ ਠੋਸ ਹਕੀਕਤ ਹੋ ਸਕਦੀ ਹੈ
ਤੇਰੇ ਬਾਰੇ ਜਦ ਵੀ ਸੋਚਾਂ ਤਾਂ ਫਿਰ ਹੋਵੇ ਇਕ ਅਚੰਭਾ
ਐਨੀ ਛੇਤੀ ਨਾਲ ਕਿਸੇ ਦੇ ਕਿੰਞ ਮੁਹੱਬਤ ਹੋ ਸਕਦੀ ਹੈ
ਕੋਈ ਮਹਿਫਲ ਕਿਸੇ ਤਰਾਂ ਦੀ ਕਿਸੇ ਵੀ ਰੁੱਤੇ ਕਿਤੇ ਵੀ ਹੋਵੇ
ਮੈਂ ਨਾ ਸੋਚਾਂ ਤੇਰੇ ਬਾਝੋਂ ਮੇਰੀ ਸ਼ਿਰਕਤ ਹੋ ਸਕਦੀ ਹੈ
ਸੌਦੇ ਹੁੰਦੇ ਤਕਦੀਰਾਂ ਦੇ ਲੇਕਿਨ ਮੈਨੂੰ ਇਲਮ ਨਹੀਂ ਸੀ
ਮੇਰੇ ਬਦਲੇ ਮੇਰੇ ਦੁਸ਼ਮਣ ਨੂੰ ਵੀ ਬਰਕਤ ਹੋ ਸਕਦੀ ਹੈ
ਸਾਵਣ ਰੁੱਤੇ ਹਾੜੇ ਓ ਰੱਬਾ ਕਦੇ ਕਿਸੇ ਦਾ ਮੀਤ ਨਾ ਜਾਵੇ
ਬੋਝ ਹੰਢਾਉਣਾ ਐਨਾ ਭਾਰਾ ਕਿਸਦੀ ਹਿੰਮਤ ਹੋ ਸਕਦੀ ਹੈ
(ਬਲਜੀਤ ਪਾਲ ਸਿੰਘ)
