ਜਦੋਂ ਇਹ ਰੁੱਤ ਬਦਲੇ ਤਦ ਬੜਾ ਕੁਝ ਹੋਰ ਵੀ ਬਦਲੇ
ਕਿਸੇ ਦਾ ਰੰਗ ਵੀ ਬਦਲੇ ਕਿਸੇ ਦੀ ਤੋਰ ਵੀ ਬਦਲੇ
ਜੇ ਬਦਲੇ ਕੂਕ ਕੋਇਲ, ਬੁਲਬੁਲਾਂ ਫਿਰ ਰਾਗ ਵੀ ਬਦਲਣ
ਅਦਾਵਾਂ ਨਾਲ ਪੈਲਾਂ ਪਾ ਰਿਹਾ ਫਿਰ ਮੋਰ ਵੀ ਬਦਲੇ
ਬੜਾ ਕੋਸਾ ਜਿਹਾ ਲੱਗੇ ਸਿਆਲ਼ੀ ਧੁੱਪ ਦਾ ਆਲਮ
ਜਦੋਂ ਬਰਸਾਤ ਆਉਂਦੀ ਹੈ ਘਟਾ ਘਨਘੋਰ ਵੀ ਬਦਲੇ
ਅਜਬ ਦੀ ਚਹਿਲਕਦਮੀ ਹੈ ਬਜ਼ਾਰਾਂ ਵਿਚ ਬੜੀ ਰੌਣਕ
ਤਿਕਾਲਾਂ ਢਲਦਿਆਂ ਮੈਖਾਨਿਆਂ ਦੀ ਲੋਰ ਵੀ ਬਦਲੇ
ਹਮੇਸ਼ਾ ਫਰਕਦੇ ਡੌਲੇ, ਲਹੂ ਜਦ ਗਰਮ ਹੁੰਦਾ ਹੈ
ਢਲੇ ਜਦ ਉਮਰ ਓਦੋਂ ਹਿੱਕ ਵਾਲਾ ਜੋਰ ਵੀ ਬਦਲੇ
(ਬਲਜੀਤ ਪਾਲ ਸਿੰਘ)
